Xanım şaxta babanın seçilməsi | Raisa Razmerita | Rumıniya | 1:36:15

 

Sinopsis:

Moldovada ən azı Yelenanın yaşadığı kənddə siyasət artıq yalnız kişilərin hökmranlıq etdiyi bir sahə deyil. Yerli idarəetmədə vəzifəyə iddialı namizədliyini irəli sürən 42 yaşlı Yelena dəyişimin gözlənilməz simasına çevrilir. Onun namizədliyi sadəcə siyasi kampaniya deyil; bu, ölkəsi Avropa İttifaqına doğru tarixi dönüşün astanasında irəliləyərkən, kök salmış patriarxal stereotiplərə meydan oxumağa cəsarət edən bir qadının hekayəsidir.

Nənə | Məhəmməd Əliyev | Azərbaycan | 0:12:36

 

Sinopsis:

Dərin şəxsi və səmimi sənədli filmdə rejissor dünyasını dəyişmiş nənəsinin xatirələrinə qayıdır və zamanın, yoxluğun aradan qaldıra bilmədiyi görünməz bağların izinə düşür. Xatirələr, duyğular və səssiz düşüncələr vasitəsilə o, kədəri ilə üz-üzə gəlmək, solmaqda olan xatirələri qorumaq və həyatda dilə gətirə bilmədiyi vidanı öz daxilində tamamlayaraq nənəsi ilə mənəvi şəkildə sağollaşmaq üçün daxili səyahətə çıxır. Film sevgi, itki, yaddaş və nəsillər arasında davam edən mənəvi bağlılıq haqqında poetik düşüncəyə çevrilərək, itirdiyimiz insanların fiziki yoxluqlarına baxmayaraq daxili dünyamızda yaşamağa davam etdiklərini göstərir.

Ulduzlu eskadrilyanın sirri | Yan Borovets | Polşa | 1:15:00

 

Sinopsis:

Ulduzlu Eskadrilyanın Sirri sənədli filmi Leonard Buçkovskinin 1930-cu ildə çəkdiyi və İkinci Dünya müharibəsi zamanı izsiz yoxa çıxmış Polşa blokbasteri "Ulduzlu Eskadrilya" filminin taleyini araşdırır. Müxtəlif ipuclarının izi ilə gedən rejissor filmin müəmmalı şəkildə yoxa çıxmasının səbəblərini və onun Merian Kuperlə olan maraqlı əlaqəsini üzə çıxarmağa çalışır. Qitələri, arxivləri və onillikləri əhatə edən bu araşdırma gizli tarixlər, uzun illər unudulmuş sirlər və gözlənilməz kəşflərlə zəngindir. Görəsən, Polşa kinosunun ən böyük itirilmiş filmlərindən birinin sirri nəhayət açılacaqmı?

Saip, mənim sevgim | Delal Yatçı | Türkiyə | 0:43:14

 

Sinopsis:

Bir zamanlar Egey bölgəsindəki bir kəndin ürəyi sayılan tarixi məktəb 1990-cı illərdə, Türkiyənin bir çox kənd yerlərində olduğu kimi, uşaqların yaxınlıqdakı daha geniş məktəblərə köçürülməsi ilə bağlanır. Məktəbin fəaliyyətini dayandırması kənddə dərin sosial boşluq yaradır və onu ən vacib ictimai məkanlarının birindən məhrum edir. Onilliklər sonra məktəbin keçmiş şagirdləri, artıq ahıl yaşlarında olan kənd sakinləri yenidən bu binaya qayıdırlar. Dövlət orqanlarının söküntü qərarının qarşısını aldıqdan sonra onlar tərk edilmiş məktəbi bərpa edərək kənd həyatının yenidən canlandığı ortaq bir görüş və paylaşım məkanına çevirmək üçün birlikdə mübarizəyə başlayırlar. Bu prosesdə yaddaş, itki, müqavimət və ümid bir-birinə qovuşaraq icma ruhunun və aidiyyət hissinin zamanın sınağından necə çıxdığını nümayiş etdirir.

Kölgəsiz dünya | Afaq Məmmədova, Cəmilə Həşimova | Azərbaycan | 0:49:43

 

Sinopsis:

Kölgəsiz Dünya türk miniatür sənətinin əbədi ənənəsini və onun gerçəkliyə özünəməxsus baxışını araşdıran poetik sənədli filmdir. Rəssamların, tədqiqatçıların və mədəniyyət xadimlərinin düşüncələri vasitəsilə film, mənəvi mənanın fiziki perspektivi aşdığı, kölgənin yoxluğunun isə varlığın daha yüksək dərkinin dərin rəmzinə çevrildiyi bir aləmi üzə çıxarır.

Kartli Krallığı | Tamar Kalandadze, Jülyen Pebrel | Fransa, Gürcüstan | 1:44:00

 

Sinopsis:

Kartli — Tbilisidə yerləşən keçmiş sanatoriyanın adıdır. Uzun illərdir istifadəsiz qalan bu bina müharibə nəticəsində didərgin düşmüş ailələr üçün sığınacağa çevrilib. Bina yavaş-yavaş uçulub dağılır, sakinlər etiraz edirlər, lakin heç nə dəyişmir. Kartli həyatla ölümün yanaşı mövcud olduğu kövrək bir saraydır; burada vəd olunmuş torpağa dair ümidlər zamanla səssizcə əriyib yox olur.

Varislər | Serj-Olivye Rondo | Kanada | 1:19:00

 

Sinopsis:

Bu intim film, Kanadanın ən böyük zibilxanası yaxınlığında yuva quran halqadimdikli qağayıların koloniyasından və onların balalarını insan sivilizasiyasının tullantıları üzərində böyütməsindən bəhs edir. Çoxalma mövsümü boyunca quşlar elmi müşahidələrə məruz qalır və sonra qədim şahin ovçuluğu sənətindən istifadə edərək onları qorxutmaq üçün getdikcə daha sərt tədbirlər görülür. Təsirli kinematoqrafiya və təbii səsin müşayəti ilə film, kütləvi istehlak və dərinləşən qlobal çirklənmənin fonunda sağ qalmanın, birgəyaşayışın və planetimizin ekoloji gələcəyinin sual altında olduğunu əks etdirir.
 

İradənin gücü | Lauro Roşa | Amerika Birləşmiş Ştatları | 1:07:22

 

Sinopsis:

Beynəlxalq uğurun astanasında, gözlənilən sıçrayışa cəmi bir neçə gün qalmış, dağıdıcı insult onun beyninin yaradıcı yarımkürəsini məhv edir. Tanınmış üsyankar rus ifaçısı ayıldıqda artıq nə yeriyə, nə danışa, nə udquna, nə də oxuya bilir.

Bir neçə il ərzində lentə alınmış İradənin gücü filmi onun kövrək və xətti olmayan reabilitasiya yolunu izləyir. Şöhrəti tədricən sönür, ailəsi isə ondan uzaqlaşmağa başlayır. Fiziki sağalma uğrunda mübarizə kimi başlayan bu proses zamanla şəxsiyyət, insanın sərhədləri və seçim azadlığı ilə onu üz-üzə qoyur.

Tibbi proqnozların qəti hökmünü sual altına alan film göstərir ki, elmin müəyyən etdiyi sərhədlər hər zaman insan iradəsinin son həddi olmaya bilər.

Yuqo Amerikaya gedir | Filip Qruyiç, Aleksa Borkoviç | Xorvatiya, Serbiya | 1:27:00

 

Sinopsis:

Serbiyanın paytaxtı Belqraddan olan dörd milennial gənc vaxtilə ABŞ-da “indiyədək satılmış ən pis avtomobil” kimi məşhurlaşmış Yuqo markalı köhnə Yuqoslaviya avtomobili ilə Amerika Birləşmiş Ştatlarını başdan-başa qət edir. Onlar Nyu-Yorkdan Los-Ancelesə qədər 24 ştatı keçərək sadə, lakin dərin bir sualın cavabını axtarırlar: “ən pis” olmaq əslində nə deməkdir? Bu səyahət boyunca onlar öz köklərinə yenidən bağlanır, Yuqo həvəskarları ilə tanış olur və unudulmuş bir avtomobilin bir-birindən uzaq iki dünyanı gözlənilməz şəkildə necə birləşdirdiyini kəşf edirlər.